శ్రీనృసింహమఙ్గలమ్

1::ఘటికాచల శృఙ్గాగ్ర విమానోదర వాసినే 
నిఖిలామర సేవ్యాయ నరసింహాయ మఙ్గలమ్ 

2::ఉదీచీరఙ్గ-నివసత్సుమనస్తోమ సూక్తిభిః 
నిత్యాభివృద్ధ యశసే నరసింహాయ మఙ్గలమ్ 

3::సుధావల్లీ-పరిష్వఙ్గ-సురభీకృత-వక్షసే 
ఘటికాద్రి-నివాసాయ శ్రీనృసింహాయ మఙ్గలమ్

4::సర్వారిష్ట-వినాశాయ సర్వేష్ట-ఫలదాయినే 
ఘటికాద్రి-నివాసాయ శ్రీనృసింహాయ మఙ్గలమ్ 

5::మహాగురు మనఃపద్మ మధ్య నిత్య నివాసినే 
భక్తోచితాయ భవతాత్ మఙ్గలం శాశ్వతీ సమాః

6::శ్రీమత్యై విష్ణుచిత్తార్యమనోనన్దన హేతవే 
నన్దనన్దన-సున్దర్యై గోదాయై నిత్యమఙ్గలమ్ 

7::శ్రీమన్మహాభూతపురే శ్రీమత్కేశవ-యజ్వనః 
కాన్తిమత్యాం ప్రసూతాయ యతిరాజాయ మఙ్గలమ్ 

8::పాదుకే యతిరాజస్య కథయన్తి యదాఖ్యయా
తస్య దాశరథేః పాదౌ శిరసా ధారయామ్యహమ్ 

9::శ్రీమతే రమ్యజామాతృ-మునీన్ద్రాయ మహాత్మనే 
శ్రీరఙ్గవాసినే భూయాత్ నిత్యశ్రీః నిత్యమఙ్గలమ్ 

10::సౌమ్యజామాతృ-యోగీన్ద్ర చరణామ్బుజ-షట్పదమ్ 
దేవరాజగురుం వన్దే దివ్యజ్ఞానప్రదం శుభమ్ 

11::వాధూల-శ్రీనివాసార్య-తనయం వినయాధికమ్
ప్రజ్ఞానిధిం ప్రపద్యేఽహం శ్రీనివాసమహాగురుమ్ 

12::చణ్డమారుత-వేదాన్తవిజయాది-స్వసూక్తిభిః 
వేదాన్త-రక్షకాయాస్తు మహాచార్యాయ మఙ్గలమ్